أحدث قصيدة للشاعر أحمد فؤاد نجم
( ينصر دينك يا بطل )
ينصر دينك يا بطل
قتلت ناس عُزًّل كتير
ستات، شيوخ وكمان عيال
ازحت عنا خطر كبير
 |
| الشاعر أحمد فؤاد نجم |
دي ناس بتقول الله محبة
والمحبه دي شئ خطير
إقتل بطرس وإقتل مينا
اللي إخواتهم ماتوا في سينا
واللي ولادهم رقصوا فـي فرحك
واللي فـ ميّتم بيعزّينا
إقتل ماري وطنط تريزا
دول ناس مافيهومشي ولا ميزة
دايمًا كده يبتسموا في وشك
ويقولوا أهلاً خطوه عزيزه
وإقتل برضه عمّك حنا
في أي خناقه بيحوش عنّا
غاوي يصّلح بين الناس
ولا يمكن يوّرد على جنّه
وإقتل سامي ناجي نجيب
أصل الإسم صراحه مريب
يمكن يطلع واحد منهم
أو داقق على إيده صليب
ولا أقولّك...إضرب شبرا
والكيت كات وميدان الاوبرا
فجّر واحده في كل مكان
خلّي جيرانهم يصبحوا عبرا
لينا رب إسمه الكريم
ها يجي يوم تعرض عليه
تقف أمامه و يسأل الشخص ده عملك إيه؟
بأي ذنب تقتله
وفين ومين وإزاي وليه؟
إبقى قول لي يا بطل
ها ترد يومها..
وتقول إيه؟
0 تعليقات: